Galicia Pinta

#euquedonacasa

Ola rapazas e rapaces de sexto!

Imos comezar cun proxecto de plástica que esperamos  que vos guste e vos axude a coñecer a algúns/algunhas pintores/as galegos/as, á vez que desenvolvedes a creatividade e a imaxinación.

Agora que tedes máis tempo, intentade esforzarvos o máis posible. Aínda que non esteamos no cole, é importante que non perdamos os hábitos de traballo. Pensade que este traballo íase facer no cole; o único que cambia é o lugar onde  ides traballar. Imos aló!

O proxecto consiste no seguinte: cada nivel/ciclo escolleu un pintor/a galego/a que ten, en maior ou menor medida, cadros relacionados co mar ou motivos mariños. Para o voso curso eliximos á pintora Menchu Lamas. Seguro que aínda non a coñecedes, pero unha vez que traballedes as actividades que vos propoñemos, saberedes o máis importante desta pintora galega. Algúns dos seus cadros están relacionados con motivos mariños; outros non. Tamén ten bastantes relacionados ca música.

Actividades

✦O primeiro que ides facer é investigar en internet quen é Menchu Lamas e ver cadros dela. Atoparedes biografías da pintora, imaxes dos seus cadros, entrevistas e reportaxes nas que a escoitaredes e comprenderedes o que para ela significa o arte de pintar e por que  pinta deste xeito.

Unha vez feito isto, escolleredes un cadro. O que máis vos guste: polas cores, pola mensaxe, polas formas, polas posibilidades que vos da para traballalo …  Pode estar relacionado co mar, ou non.

✦Intentade inspirarvos no cadro escollido e traballade sobre el. Podedes intentar imitalo, podedes partir de aí e crear o voso propio cadro … todo é valido. Os/as  artistas sodes vós. En canto á técnica: podedes empregar pincel,(acuarela, acrílico…) lápis, facer un collage con distintos materiais, combinar as diferentes técnicas … ao voso gusto. Tedes que  solucionar cos materiais que hai na casa; non debedes   saír a mercar nada!!! Papel de xornal, de cociña, de baño, celofán, cartón … todos os materiais son válidos. Emprega a túa imaxinación! O tamaño… o que queirades.

✦Cando o cadro estea rematado, escolleredes un título, que poderá coincidir co do cadro orixinal ou poderedes inventalo vós, ao fin e ao cabo, vós sodes os creadores. Buscade unha esquiniña para plasmar o voso nome.

✦Elaboraredes unha ficha técnica cos seguintes datos.

•      Título da ficha:  será o nome orixinal do cadro e a súa autora.  Agora é o momento de recabar a información e respostar ás seguintes cuestións. Podes ir contestando cuestión a cuestión ou enlazar as respostas a modo de redacción. As dúas opcións son válidas. Aí van:

•   Quen é Menchu Lamas? Sitúaa no tempo e no espacio. Breve, pero significativa, biografía. Selecciona datos que consideres importantes para o traballo que estás a facer. Non nos importa se tivo fillos ou non, pero sí onde se formou, onde vivíu, cando decidíu ser pintora, por que emprega esas cores… datos que vos fagan comprender a súa forma de expresión.
•   Características  da súa obra. Aquí podes mencionar todo o que ti consideres importante: que tipo de pintura fai, que cores emprega, os materiais, tamaño das súas obras… Lembra que debes entender o significado do que escribes; non se trata de copiar e pegar. Para facer esto observa con atención os seus cadros, reflexiona sobre eles e intenta captar características sinxelas da súa obra.ü 
•   Significado do cadro escollido . Explica o que pensas que quixo representar a pintora. No caso que o teu cadro teña variantes e sexa distinto do orixinal, explica que quixeches expresar.
•    Opinión persoal sincera da pintura desta artista.
•    Cadros  que máis che gustaron dela.

  Recomendacións               

 Para que, ademáis de aprender, podas desfrutar con este traballo, non o fagas a correr. Faino con tempo. Acompáñate de música, se che apetece. Deixa voar a túa imaxinación e desfruta pintando, recortando, pegando, enchendo, rebuscando materiais… Se ti o fas con ganas, o resultado será fantástico.

En canto á ficha técnica, faino primeiro a sucio. Fíxate na forma de expresar as túas ideas. Pensa que alguén vai ler o que ti escribiches e ten que entendelo. Presta atención á ortografía, á puntuación das frases … todo suma para que o teu traballo sexa estupendo. Cando esteas satisfeito/a e penses que está correcto, podes pasalo a limpo. Lembra que a presentación, importa.

A que esperas? Veña, mans a obra!!!!

Calquera dúbida podedes consultala con nós aos correos que puxemos a vosa disposición. Non dubidedes en facelo.

Coidádevos moito!

Unha aperta para vós e as vosas familias.