Hoxe tocan ... as cordas!!!

#xuntosconseguirémolo

Ola a todas e todos!!

Benvidos/as a un novo Concerto Didáctico; e xa imos polo quinto.

Cambiamos de familia instrumental. Xa pasou por aquí a familia da percusión, a familia do vento, os instrumentos de música tradicional galega e hoxe comezamos ca familia da corda; estes instrumentos tamén poden chamarse cordófonos.

Hoxe imos afondar en dous instrumentos moi coñecidos da familia dos cordófonos: a guitarra e o piano.
Para falar deles e deleitarnos cas súas interpretacións, temos con nós a un grupo de nenas e nenos do cole. Tamén haberá algunha que outra sorpresiña. Imos recibilos cun grande aplauso.

Comezamos ca guitarra. Para falar deste fermoso instrumento, hoxe están con nós Amelia, Sabela e Ximena. Escoitádeas atentamente porque as tres prepararon con moitísima ilusión o que agora ides ver.

Imos ca primeira sorpresiña recibindo a Ariel. Ariel foi alumno do cole; agora xa está no instituto pero hoxe quixo acompañarnos e  amosarnos as súas guitarras. Si, guitarras, en plural! Ariel, cando queiras.

Cambiamos de instrumento e, aínda que tamén é de corda, os teclados que imos ver non teñen cordas porque son eléctricos. Naiara, Alejandro e Natalia son os intérpretes.  Adiante o piano!

Chega a segunda sorpresiña. Imos escoitar a Mario, que tamén foi alumno do cole. Mario vai interpretar unha fermosa sonatina de Dussek. Escoitade, escoitade ... e veredes que ben toca. 

Moitas grazas por acompañarnos e compartir con nós esta peza tan fermosa, Mario. Estou moi contenta de que ti e Ariel poidérades participar neste concerto.

Ata aquí o concerto de hoxe. Quedade tranquilos/as que aínda non rematamos con esta familia. A vindeira semana os instrumentos de corda fretada serán os protagonistas. 

Ximena, Sabela, Amelia, Alex, Natalia, Naiara, Mario e Ariel ... isto é para vós. Moitas grazas!!

Antes de marchar, imos escoitar unha obra de cada un dos instrumentos protagonistas de hoxe. A primeira, "Recuerdos de la Alhambra", de Francisco Tárrega. A intérprete é  Ana Vidovic, unha guitarrista croata.

Francisco Tárrega (1852-1909) foi un compositor español e un exemplo de superación persoal. Cando era neno tivo un accidente que o deixou practicamente sen vista. Grazas ao seu esforzo e ao da súa familia,  convertiuse nun dos mellores compositores e guitarristas de todos os tempos.

Para o piano costoume moito escoller, porque hai tantas obras e tan fermosas... Compositores como Chopin, Beethoven, Schumann, Schubert, entre outros, escribiron obras marabillosas para este instrumento. 
Finalmente decidínme por estes dous estupendos pianistas que interpretan "Rhapsody Hungarian nº2" do compositor e pianista Franz Lizst. Os intérpretes son Yannie Tan, unha pianista de dezaseis anos, e outro intérprete,  non tan virtuoso pero moi simpático, coñecido por todos vós.  Espero que vos guste!!

Exposición de instrumentos  

Seguide baixando nesta lapela e atoparedes a entrada "Viaxando polas cordas". Hoxe temos a mesma actividade para todos os cursos: viaxaremos no tempo a través destes instrumentos para comprender a súa orixe. 

Espero que vos gusten!! 

Os/as rapaces/zas de sexto que pertencedes ao grupo de flautas "Divertimento", pasade pola vosa lapela que hoxe deixei algo para vós.

Que facedes aí???  Veña, baixade  ... a petiscar!!!

Viaxando polas cordas

#xuntosconseguirémolo

Ola rapazas e rapaces!

Que vos pareceu o concerto de hoxe?  Xenial, non si?
Hoxe imos aprender xuntos un pouquiño da historia dalgún dos instrumentos de corda. Comezamos!!!
Dentro desta gran familia, os instrumentos clasifícanse, dependendo de como se produza o seu son, en instrumentos de corda fretada, de corda percutida e de corda pulsada ou punteada. Imos ver que instrumentos pertencen á familia da corda, ou instrumentos cordófonos.

Ímonos centrar na corda percutida e na corda pulsada. Para afondar neles, imos ver unhas fotos de familia.

Instrumentos de corda pulsada ou punteada

Aínda que nesta foto aparecen os máis coñecidos, hai moitos máis que varían a súa forma, o seu nome, incluso o propio instrumento ten variantes  nas diferentes culturas. Pero iso xa o veremos noutra clase. Agora fixádevos ben nun dos instrumentos ... que raro semella!!!

Que é a cítara?

 A cítara é o instrumento musical de corda máis antigo que inicia a liña evolutiva do piano. É orixinario de África e do sudeste de Asia e remóntase á Idade do Bronce, arredor do ano 3000 antes de Cristo. Fixádevos se é antigo!!!
Este mestre explica moi ben que é a cítara, cal é a súa orixe e o xeito de tocala. Fixádevos nas partituras que se empregan. Son sorprendentes.  É un vídeo moi interesante e de seguro que vos vai gustar.

Ca cítara pódese tocar calquera tipo de canción. Coñecedes esta?

Claro que si! É a música da película "The Beauty and the Beast" de Walt Disney.

Se vos gusta este instrumento, anímovos a que investiguedes máis sobre el e vexades máis vídeos; poderedes atopar moitos, con diferentes tipos de cítaras. 

Cambiamos de grupo e imos á corda percutida, onde o instrumento máis representativo é o piano, que pode ser vertical e horizontal ou de cola. Imos coñecer ao avó e ao pai do piano. 

Instrumentos de corda percutida

Salterio ou dulcimer.

A cítara foi evolucionando e inventouse o salterio ou dulcimer, un instrumento construído sobre os principios da cítara. Tiña forma tropezoidal dependendo das distintas lonxitudes das súas cordas. 

                                

O salterio seguiu a evolucionar. A idea era atopar algún tipo de mecanismo que non estivera en contacto cos dedos. Fixéronse bastantes experimentos; un deles foi o clavicordio. As súas cordas eran percutidas por pequenas púas de metal, accionadas polas teclas. Imos ver e escoitar un clavicordio orixinal do ano 1620. Que lonxe!! Veredes que xa ten bastante semellanza co piano.

                             

Como contou Naiara no concerto de hoxe, o inventor do piano foi Bartolomeo Cristofori e chamoulle pianoforte, pola capacidade que tiña de facer sons de diferente intensidade: suaves (piano) e fortes (forte). Estes amigos van explicarnos moi ben o que queren dicir estas palabras. Tomade nota!!!

"Piano, forte"

                        

Imos ver unha escea da película "Amadeus" na que o seu protagonista Mozart, toca nun pianoforte.

                               

,

Desde os primeiros pianos de Cristofori ata a actualidade houbo grandes melloras e avances, mais a idea fundamental para a súa construcción segue a ser a mesma. Na maquinaria do piano as cordas son percutidas por macillos, accionados polas teclas, que rebotan inmediatamente deixando á corda vibrar libremente. Imos ver un piano por dentro. 

                         

TIPOS DE PIANOS

🎹 Piano de cola

No piano de cola, a caixa de resonancia e as cordas atópanse en posición horizontal.

🎹 Piano vertical

No piano vertical, ou piano de parede, a caixa de resonancia e as cordas están en posición vertical.

🎹 Piano eléctrico ou dixital

O piano eléctrico produce o son mecánicamente e convérteo nun sinal de audio electrónica mediante pastillas (pickups). É un instrumento electromecánico.

Para rematar, déixovos cunha escea da película "El pianista". Para a súa interpretación o actor protagonista, Adrien Brody, aprendeu a tocar o piano por si mesmo.  Pola súa interpretación gañou un Óscar con 29 anos. 

                        

"Ballada nº1". Frédéric Chopin.

                             

Antes de marchar, animádesvos a construír algún instrumento de corda esta semana? Deixovos aquí algúns enlaces. Hai moitas posibilidades. Para algúns precísase empregar tesoiras e/ou cuter; lembrade que para iso precisades a axuda dun adulto. Enviádeme as fotos !!! 

Cítara con caixa de cartón. Moi facilliño. Podedes facelo do tamaño que queirades.

Guitarra con caixas de cartón.  É faciliño; hai que cortar. Ollo!

Guitarra con bote de plástico. Moi faciliño tamén; hai que cortar. Ollo!

Piano de cartón. Bastante complicado pero é tan bonito ... Mirádeo!!

Debuxo unha guitarra

Debuxo unha guitarra eléctrica

Debuxo un piano

Agora sí que marchamos. Vémonos a semana que ven! Traballade moito e petiscade na frauta os cursos 3º,4º,5º,e 6º.

 Non vos esquezades!!!

                  "Johnny be good". Chuck Berry. Da película "Regreso al futuro"

                            
                                   

Máis bicos !!!

"O son do ar"

#xuntosconseguirémolo

Ola músicos e músicas!!

Como estades? Espero que todo vaia ben. Ánimo, que estamos na recta final!!

Hoxe vou deixar unha partitura para os/as que vos apeteza facer algo novo. 

"O son do ar". Bieito Romero

           
Imos botar un ollo. Hai algunha cousiña nova, mais ao ser unha melodía coñecida para todos/as, vai ser moito máis doado.

Compás: 6/8. Non o vimos no cole. É o compás da muiñeira. Cada compás ten dúas partes (como o 2/4), pero en cada parte entra unha negra con puntiño (no 2/4, unha negra). Polo tanto entrarán 3 corcheas en cada parte, e 6 corcheas (3 megras) en todo o compás. 
Grupos rítmicos. Básicamente son os grupos que aprendimos na partitura da "Rianxeira" : 3 corcheas, corchea con puntiño, semicorchea e corchea e negra con puntiño. 
Alteracións: fa sostenido. Sabédelo de memoria. 
Sinais de repetición: dous puntiños e 1º e 2º vez. Chupao!!

Veña!!! Mans á obra. Escoitádea varias veces seguindo a partitura ca vista. Veredes que, aínda que ten novidades,  non é complicada. Déixovos aquí a partitura por se a queredes imprimir.

 "O son do ar". Frauta.

"O son do ar". Luar na lubre.

           

Animádevos a enviarme algún vídeo tocando esta canción ou a que prefirades. Veña... que xa queda pouco e hai que ir preparando o Concerto de Fin de Curso.

Unha grande aperta.

Captamos imaxes

                                                                       Xiana, 6ºC

Ola a todos! Imos xa cas últimas actividades do curso. 

Hoxe ímosvos propoñer tres actividades. O prazo para entregalas é o venres 12 de xuño. Insistimos na importancia de que entreguedes os traballos nos prazos marcados; sempre é importante máis nesta ocasión non se poderá entregar con retraso, xa que os profes temos que avaliar o voso traballo.

✱ 1ª actividade: "Técnicas creativas".

Desta actividades hai que escoller e realizar dúas propostas. Podedes facelo sobre a obra que aparece no vídeo ou sobre outra que vos apeteza, empregando a técnica explicada. 

Ollo! na primeira proposta precisades a axuda dun adulto para manexar o cuter e a prancha. Se non podedes dispor desta axuda, non a escollades.

                                                   "Con restos de cera plastidecor"

"Con bolsas de papel ou con papel  de cores"

"Con burbullas"

✱ 2ª proposta:  "Papiroflexia".

Seguimos ca papiroflexia, agora un pouquiño máis difícil. As propostas destas semanas son: un peixe, un corazón e un barquiño tradicional. Aínda que para o peixe e o barco se empregue papel branco, vós podedes empregar papel de cores; quedará moito máis lucido. Poderedes tamén poñerlle detalles e será un traballo moi completo. Se vos apetece, tamén podedes facer algunha máis das que vos deixamos. 

Desta actividade teredes que realizar as tres propostas.

"Corazón"

"Barquiño"

"Peixe"

✱ 3ª actividade: "Fotografía".

Trátase de que intentedes facer unha foto artística a un obxecto, unha paisaxe, un determinado momento ... Estade atentos ao voso contorno e, no momento que vexades algo que vos guste, captade a imaxe. De todas as fotografías que fagades, escollede unha, poñédelle título e enviádea.

✱ Norma xerais para entregar as actividades:

- Enviádeas todas xuntas.

- Deben ter o voso nome e título da obra.

- A foto dos traballos debe estar ben encadrada, sen nada debaixo.

-Da terceira actividade, aínda que fagades moitas fotos, só hai que enviar unha. Escollede a que máis vos guste.

- Intentade cumprir o prazo. O venres 12  de xuño é o último día. Ollo!! Non recolleremos traballos despois dese día.

Esperamos que desfrutedes destas actividades. 

Moito ánimo que xa estamos na recta final!!

Unha grande aperta:

Olga e Charo

Hoxe toca ... GALICIA!!!!

 "As mariscadoras". Luis Seoane.                                                                                                                          Hajar, 6ºC     

Ola! Benvidas e benvidos a Petiscos Musicais!

Hoxe, 17 de maio, Día das Letras Galegas, é un día moi especial e ímolo festexar cun Concerto Didáctico no que coñeceremos máis a fondo algúns dos instrumentos tradicionais da nosa cultura. Para isto temos con nós a uns/unhas mestres/as de primeira que falarán dos seus instrumentos e deleitarannos con algunha peza. 

Preparádevos. Hoxe ...festa rachada!!!

Comezamos cun dos instrumentos tradicionais galegos máis populares. Esta copla tradicional será a encargada de presentalo.

Saca Marica do fondo da ucha

un neto de caña do tinto ribeiro;     

saca, Marica, que case me ole,

mentras que ven esa gaita de fole.

                                      Copla tradicional.              

Descubristes de que instrumento estamos a falar? Claro que si! A gaita de fol. Para falar un pouquiño deste instrumento imos comezar co primeiro convidado. Chámase Dubi, é mestre de gaita e percusión tradicional, ademáis dun bo amigo. Hoxe está con todos nós para contarnos cousas moi interesantes sobre a gaita de fol. Escoitade con moita atención.

Dubi e Carmen, nai duns alumnos do cole, trouxeron este vídeo para vós. Vaivos encantar; espero que me enviedes as vosas creacións. Grazas aos dous!

Moitas grazas Dubi! Agradecemos moito que compartiras con nós un anaquiño deste día. Non marches; nós tamén temos algo para ti. Agardamos que sexa do teu agrado.

Enzo e Natalia levan moi pouquiño tempo tocando, mais quixeron agasallarnos con estas pezas. Moitas grazas polo voso esforzo e participación, rapaces.

Agora vouvos presentar a Pepe, un amigo da familia. Pepe toca un instrumento que moitas e moitos de vós nunca vistes e que forma parte da nosa cultura desde hai séculos: a zanfona.  

Anda o cego ca zanfona                                            Un cego caeu nun pozo

tocando de feira en feira;                                         outro cego lle miraba,

a conta de catro parvos                                           outro cego lle decía:

henche o cego a faltriqueira.                                   xa está a zanfona mollada. 

                                                                                      Coplas tradicionais

Sabedes que Pepe foi o meu profesor de matemáticas cando eu era unha rapaza? Pois si, e hoxe faime moita ilusión que estea con nós, amosándonos este fermoso instrumento. Moitas grazas, Pepe !!

Que sería destas fermosas melodías sen o acompañamento dos instrumentos de percusión? Mirade que boa parelliña fan os instrumentos que tocan Iria e Mateo. 

Que ben tocan estes rapaces!! Iria foi alumna do noso cole ata que marchou para o instituto; hoxe estou moi contenta que poidas participar neste concerto co teu irmán Mateo. Grazas, rapaces!! 


Esta miña pandeireta                                               Tocai ben a pandeireta
ten o coiro de castrón,                                             pra que sonen as ferreñas,
o ariño de salgueiro                                                 que vai sair o Manuel
e as ferreñas de latón.                                             a bailar co´a millor nena.
                                               
                                                                                       Coplas tradicionais

Para falar da pandeireta está aquí Fransy. Fransy é transmisora de música tradicional e unha das grandes no mundo da música tradicional galega. Estade moi atentos/as porque Fransy non veu soa; tróuxonos unha sorpresiña. Adiante esas pandereteiras e cantareiras!!!

Moitísimas grazas a Noa, Xiana, Olivia, Carmen, Camila e Noa; un agradecemento especial a Fransy, que foi a encargada de organizar este traballo. Foi un pracer estar con vós e a vosa música.  


Eres a sota de bastos,                                                  O galiteiro toca a gaita
eres piollo reghalado,                                                   a muller toca o tambor,
eres tambor de cortiza                                                  os fillos tocan o bombo
que ten o coiro furado.                                                 o can ládralle ó roncón.

                                                                                         Coplas tradicionais


Seguimos ca percusión da man de Alexandre, un ensinante de música tradicional que nos vai amosar algúns dos instrumentos de percusión da tradición galega.

Moitísimas grazas Alexandre, por estar hoxe con nós e  por amosarnos estes instrumentos dun xeito tan entretido. 

Ata aquí cos instrumentos de hoxe. Se queredes saber máis sobre eles e moitos outros, poderedes descubrilos na  páxina  Os instrumentos musicais na tradición galega facilitada por Alexandre. 

Convídovos tamén a visitar o blogue percusiongalega.com, un espazo moi interesante creado por Dubi e adicado á didáctica da percusión galega.

Para seguir gozando da música con Fransy González, déixovos este enlace para escoitar a Xota de Negreira de Vilamaior, que forma parte do seu novo proxecto musical xunto a Davide Salvado e Cibrán Seixo.

Seguimos gozando da música. Imos darlle a benvida a estes mariñeiros e mariñeiras de segundo de primaria recén chegados do mar para cantarnos esta canción popular.

"Catro vellos mariñeiros"

Moitas grazas ao alumnado e ao profesorado de segundo de primaria que elaboraron esta montaxe para compartir neste día.

Da arte da música pasamos á arte da pintura. Este curso estivemos traballando no proxecto "Galicia pinta"; nesa andaina coñecimos, entre outros,  a pintores e pintoras de Galicia como Jorge Peteiro, Luis Seoane e Menchu Lamas, da que vos presentamos unha exposición dos cadros creados polas rapazas e rapaces de sexto de primaria. Esperamos que vos guste!

"Galicia pinta"

E ata aquí chegamos no día de hoxe. De novo, quero agradecer a todos/as os/as que, con tan boa vontade e ilusión, participastes neste concerto organizado desde a aula de música do Ceip Arteixo, para festexar o Día das Nosas Letras e da Nosa Cultura. Tamén darvos as grazas aos que, da outra beira,  estivestes compartindo con nós un anaquiño deste día.

Pechamos o concerto cunha sopresa. Artai xa non está no cole, mais hoxe quixo agasallarnos con esta fermosa interpretación ao violín do Himno Galego. Estou segura que vos gustará! Unha grande aperta a todas e todos. Feliz Día das Letras Galegas!!

Moitas grazas Artai!!

Lembrade que xa podedes facer as actividades da semana; cada curso debe mirar no seu petisco. Non vos esquezades!!!

Deica logo!!

"A Rianxeira"

"As mariscadoras". Luis Seoane.                                                                                                          Carlos Senra, 6ºC

Ola rapaces e rapazas! Aquí estamos cunha nova partitura. 

Que vos pareceu o Concerto Didáctico do Día das Letras? Se aínda hai algún/algunha de vós que non o viu, recoméndovolo porque saen moitos/as compas do cole e ides aprender moitas cousas sobre os instrumentos traicionais galegos. Tamén están expostos os vosos traballos de plástica sobre Menchu Lamas; así que non o podedes perder. 

Como esta semana traballamos a música tradicional, a canción de hoxe é unha canción popular galega que todos/as coñecedes: "A Rianxeira". 

Cun bonito acompañamento de piano, poderedes aprender a tocar esta peza tan popular. Como veredes, primeiro tocades acompañados dunha frauta que fai a melodía e un piano. Despois, tocades só co acompañamento de piano. Non é difícil pero é bastante rapidiña, con figuras curtas, moitas corcheas, que fan que o ritmo sexa rápido.

Imos botarlle un vistazo: 

Compás:  o primeiro que ides ver, e  que non coñecedes, é o compás de  3/8; no cole nunca o vimos pero non é difícil. En realidade, é como un 3/4 pero en cada tempo entra unha corchea en vez dunha negra; polo tanto, en cada compás entran 3 corcheas, por iso vai máis rápido.

Grupos rítmicos: como no compás entran tres corcheas, os grupos rítmicos que imos ver son 3 corcheas xuntas, corchea e negra (e ao revés) e negra con puntiño. Outro grupo que ides ver, ao final,  é corchea con puntiño, semicorchea e corchea. Unha vez que o escoitedes, non ides ter problema. O truco é escoitala varias veces seguindo a partitura antes de estudiala e, despois, poñerse a traballala con calma. 

Alteracións: tedes dous sostenidos para as notas fa e do. Xa sabedes como se fan; de todos xeitos tedes a táboa de dixitación na clase anterior. Consultádea.

Estrutura: A-B-B´-A-B-B`.

E non hai moito máis que explicar. Se tedes dúbidas, escribídeas en comentarios, porque así podemos axudarnos uns aos outros, vale?

"A Rianxeira"

Agora imos facer un exercicio rítmico ca "Muiñeira de Pontesampaio". Veredes que na partitura aparecen claves, ferriños, pandeiretas e cunchas. Seguro que non tedes todos eses instrumentos na casa pero podedes amañar para sustituilos polas palmadas e algún dos que construistes. Se vos falta algún, podedes elaboralo. Sexa como sexa (aínda que só o fagades ca percusión corporal) traballade os ritmos e facédeos ca música.

Hoxe non vou deixarvos moito máis; tedes bastantes partituras en xogo e hai que ir sacándoas adiante.

Antes de marchar, anúnciovos que a semana que ven faremos unha "videoclase"; xa vos avisarei do día e da hora de cada grupo. Hai moito tempo que non nos vemos e teño moita gana de vervos a todos/as. Ide repasando as cancións que estivemos aprendendo e as que xa sabiamos. 

Gustaríame tamén que experimentedes cas palliñas e intentedes facer a frauta que nos ensinou onte Abraham Cupeiro. É moi doado de facer e moi sorprendente o resultado. Animádevos e compartide asd vosas creacións. Déixovolo aquí outra vez.

                              

Despedímonos cun dos instrumentos que vimos onte no Concerto Didáctico, e un dos máis populares da nosa cultura: a pandeireta. 

O que imos escoitar titúlase "Xota de Negreira de Vilamaior". Os músicos son  Davide Salvado, voz e pandeireta, Cibrán Seixo que toca o violín e o moog, un teclado ou pedalero que se toca cos pes, como podedes ver no vídeo, e  Fransy González, voz e pandeireta. Fransy é a mestra de pendeireta de Xiradela e estivo con nós no concerto do Día das Letras, falou sobre a pandeireta e  cantou un par de pezas para nós.

Os instrumentos da música tradicional, como a pandeireta, pódense fusionar con calquera outro instrumento, sen deixar o seu caracter tradicional. Se vos gusta, podedes seguir curioseando en youtube e veredes que estes músicos teñen moitas pezas bonitas.

Espero que vos guste.

                                

Vémonos a semana que ven! Petiscade na frauta que xa estamos na conta atrás. 

Unha aperta!!!!

"O son do ar"

"As mariscadoras". Luis Seoane.                                                                                                             Celia Ferrín, 6ºC

Ola rapaces e rapazas! Aquí estamos cunha nova partitura. 

Que vos pareceu o Concerto Didáctico do Día das Letras? Se aínda hai algún/algunha de vós que non o viu, recoméndovolo porque participan moitos/as compas do cole e ides aprender moitas cousas sobre os instrumentos traicionais galegos. Tamén poderedes desfrutar dunha exposición de cadros dos vosos/as compañeiros/as de sexto da pintora Menchu Lamas; así que non o podedes perder. 

Como esta semana traballamos a música tradicional, a canción de hoxe é unha canción galega, composta por Bieito Romero, que todos/as coñecedes: "O son do ar". 

É unha versión sinxela, pensada para frauta e os instrumentos de láminas da clase, pero como así non o podemos facer, ides traballar só a parte da frauta; polo tanto, das catro voces que ides ver, só tocades a de arriba, que é a voz da frauta.

Imos botarlle un vistazo:

Compás: 3/4, xa o coñecedes; tres negras en cada compás.

Grupos rítmicos: branca con puntillo, negra con puntillo e corchea, branca con negra ... nada novo.

Alteracións: un bemol para a nota si. Xa está visto no cole pero se non vos lembrades, déixovos a táboa de dixitacións.

Estrutura: A-A`-B-B`-A. Fixádevos ben nos sinais de repetición.
É importante que primeiro escoitedes varias veces a melodñia e sigades a vista na partitura mentres escoitades. Logo, xa podedes comezar a traballar. 

Se tedes dúbidas, escribídeas en comentarios, porque así podemos axudarnos uns aos outros, vale?

Agora imos facer un exercicio rítmico ca "Muiñeira de Pontesampaio". Veredes que na partitura aparecen claves, ferriños, pandeiretas e cunchas. Seguro que non tedes todos eses instrumentos na casa pero podedes amañar para sustituilos polas palmadas e algún dos que construistes. Se vos falta algún, podedes elaboralo. Sexa como sexa (aínda que só o fagades ca percusión corporal) traballade os ritmos e facédeos ca música.

Hoxe non vou deixarvos moito máis; tedes bastantes partituras en xogo e hai que ir sacándoas adiante. Intentade tocar todas as semanas para afianzar o aprendido.

Táboa de dixitacións 

Gustaríame tamén que experimentedes cas palliñas e intentedes facer a frauta que nos ensinou onte Abraham Cupeiro. É moi doado de facer e moi sorprendente o resultado. Animádevos e compartídeo. Déixovolo aquí outra vez.

Despedímonos cun dos instrumentos que vimos onte no Concerto Didáctico, e un dos máis populares da nosa cultura: a pandeireta. 

O que imos escoitar titúlase "Xota de Negreira de Vilamaior". Os músicos son  Davide Salvado, voz e pandeireta, Cibrán Seixo que toca o violín e o moog, un teclado ou pedalero que se toca cos pes, como podedes ver no vídeo, e  Fransy González, voz e pandeireta. Fransy é a mestra de pendeireta de Xiradela e estivo con nós no concerto do Día das Letras, falou sobre a pandeireta e  cantou un par de pezas para nós.

Os instrumentos da música tradicional, como a pandeireta, pódense fusionar con calquera outro instrumento, sen deixar o seu caracter tradicional. Se vos gusta, podedes seguir curioseando en youtube e veredes que estes músicos teñen moitas pezas bonitas.

Espero que vos guste.

                                

 Un grande bico!!!